​汪道涵先生个两次“保护”

原创 朱学勤 海上梦叠

作者：朱学勤

文字改写：边秦翌

沪语诵读：何振华

（大家好，我是何振华。一年一度个上海书展，终于要如期开幕了。此时此刻，有人深深个怀念阿拉个老市长，也是一个书迷，汪道涵老先生。今朝仔，我搭大家读一读，朱学勤教授写个一篇感人肺腑个文章，《汪道涵先生个两次“保护”》。）

我搭汪老认得勒老晚，此后接触也老少。伊对我有过两趟“保护”，一趟是勒认得之前，一趟是勒认得之后，但伊本人却从来也呒没勒我面前提起过。

2000年个春天，我因故被提出必须要离开讲台。此前香港中文大学邀请我去做短期个访问，上海校方还有犹豫，听到封课令下来，立刻批准我出境，对上就回答“迭个人已经勿勒讲课个名录里了”。汪老呢，勿晓得从啥个渠道得到迭个消息，明确反对。当时汪老闲话讲得邪气动感情：“如果阿拉连搿能个知识分子都勿能宽容，还能团结啥个人啊？！”迭个辰光，我搭汪老还勿认得。

2001年春节期间，正是万家团聚、共庆佳节个辰光，汪老让秘书拨我打电话，邀请我搭上海另外一个知识分子去交伊见面，勿为别个事体，只谈阿拉所晓得个社会实情搭仔外交困境。因为是报忧勿报喜，自始至终只见伊紧蹙眉头，只听不言，即使是对一些同志个直接批评，伊也勿打断。结束个辰光，只听到汪老长叹一声：“还是要拿阿拉自家个事情办好啊！”迭个是我第一趟交伊见面。

迭个一年秋天，“三农”问题成为舆论焦点，也成为传媒个焦点。汪老呢，召集小范围个座谈，事先关照，勿听官式汇报，只要真情实况。伊要我交另外两个朋友想办法，一竿子插到底，以私人个名义请外省个朋友直接来上海，勿要交当地个官方打招呼。结果呢，从湖北、从安徽请来了一个村会计、一个乡干部、一个地市级个副书记，形成勒一个非正式个“三级会议”。

迭三个朋友风尘仆仆到仔上海，尤其是埃个乡村老会计，第一趟从内地到上海，一看碰着汪老，不免就窘迫，神色紧张。汪老起身，招呼伊拉一一坐下，汪老个长者之风，鼓励了伊拉放胆直言，百无禁忌，很快打消了伊拉个顾虑。会议一结束，汪老立刻飞到北京，迭个一年，汪老已经年过80高龄，“三农”问题勿勒伊个工作范围里头。据说，此后个农村减负、农民处境个改善，侪交汪老迭个一次北上邪气有关系。

此外还有一趟会议，是汪老请北京中央编译局个朋友来上海研讨欧洲社会民主党，分国别作详细介绍。迭个一天伊身体勿好，因为刚刚手术呒没多少辰光，事先讲好半天开会，半天休息。啥人晓得伊听了兴头浪，中饭也勿想回去吃了，鼓励大家继续讲，伊要连续个听下去。会议后半场有上海本地一知识分子站起来激动表态，“马列主义传统不能丢！”

参加会议个人面面相觑，颇感诧异。北京个朋友小声个对我讲，“上海个氛围还介‘左’啊？侬勒此地还蹲得下去啊？”然后呢，伊就盯牢汪老看，看汪老对迭能个“表态”又哪能表态？只看见汪老听到搿能个发言，一言不发，埋头做伊自家个笔记，就像呒没听到一样，会议如期进行。

2003年个春天，李慎之先生去世。此前三年，慎公因为发表一篇《风雨苍黄五十年》个文章，一些同时代个老人勿敢交伊交往。但是慎公交汪老毕竟是“生前友好”，我犹豫再三，还是拿慎公临终病情发拨汪老一份，只是让伊知晓，并呒没奢望汪老，勒迭种辰光能够讲啥个闲话。

啥人晓得，汪老读到迭份材料，伊居然读出了我都没有发现个一个细节，汪老慨叹：“北京迭个地方，春天供暖一停止，室内还是老冷，伊呒没勒屋里添置取暖个设备，是冻出毛病。慎之个晚年窘迫啊！”迭个是伊身边个人事后告诉我个，连我都感觉意外。汪老“文革”个辰光勒北京度过一段艰难个辰光，只有一个过来人再会有迭能细致入微个体会。

慎公追悼会召开前夕，我参与后事，起草讣告、悼词，突然接到汪老身边个人个电话：“老先生委托侬拨李慎之送挽联，送花圈。”我感到意外，我问，迭个挽联哪能写？电话中讲：“汪老是全权委托，呒没限制。”我交慎公个囡儿商议，能勿能克制一点，因为，只要写“慎之先生千古，汪道涵”，迭个九个字，只要有汪老个名字勒勒，就能震慑某一些势利者，比啥个侪管用。

后来果然发生作用了，慎之个囡儿告诉我，中国社科院一开始态度冷淡，一看汪老送有花圈交挽联，立刻改变态度，派人出席了追悼会。

2004年个夏天，我勒一些知识界个朋友应阿登纳基金会邀请访问德国。因为是非官式访问，与各行各业个朋友直面交流，甚至当面争论，双方侪觉着邪气有收获。访问一结束以后呢，我到欧洲其他个国家私人访友。人还呒没回到国内，就有种种不利个消息、各种各样讲法传出来，帽子扣得邪气重，眼见得又有一场风波要发生了。

汪老听到了消息，不动声色，先让身边人了解情况，再等我拿访德纪行，迭个一批文章勒杂志浪一篇一篇个登完。伊看完所有个文字，平平淡淡个讲了一句闲话，也是结论：“学勤讲得很委婉啊，忒委婉了伐。”汪老迭能一讲，举重若轻，迭个一些人做勿成文章，一场风波不了了之，就此停歇。迭个一桩事体从起到了，勒过程当中我完全勿晓得，也是事后有人告诉我，我再晓得。

我有一个学生见过汪老一趟，称汪老有“古时候个大臣之风”。汪老迭能个风范啊，相信还有很多。对慎公个真情悼念，对后人尽可能予以个一些保护，只是我所晓得个一部分。我交伊个接触也有限，也只能讲搿能两桩事体。

我呢，想过一些问题：我觉着，老先生身居高位，为啥道理会得有迭能个情怀？除脱本人个修养之外，或许交伊三种经历分勿开个：第一，民国时代勒上海受过完整个高等教育搭仔人文熏陶；第二，1949年之后勒勒党内长期冷落，不受重用；第三，“文革”当中被打翻在地，备经磨难。有迭能个经历，对民主法治、人道尊严有内在个体会，对敢言者、受压者有深切个同情，厌恶迭个一些高位压人、矫情表态、动勿动就告状个文革后遗。

阿拉老百姓对迭能一位党内老人、阿拉个老市长有一个正面个说法，叫“两头真”。汪老轻易勿发言，但内心深处我相信伊也是迭能一个人。伊早年参加革命是追求一个民主自由个社会，并勿是为了一己翻身，晚年重返岗位，到了高位，则尽可能个舒解民困，尊重人，爱护人，保护人。

迭能个老人啊，走一个少一个，难有后继，故而，再会有介许多个知识分子黯然个伤怀，以各种个方式怀念伊拉，追忆伊拉。

讲述：何振华

原标题：《​汪道涵先生个两次“保护”》

阅读原文