《一条乔家路 半壁老城厢》

原创 倪祖敏 海上梦叠

作者：倪祖敏

文字改写：边秦翌

沪语诵读：何振华

（三） 徐光启故居正门勒俞家弄

（大家好，我是何振华。今朝继续为大家分享倪祖敏老师个文章《一条乔家路半壁老城厢》）

讲起迭个徐光启故居“九间楼”，可以讲是闻名遐迩，但是大家只晓得徐光启故居“九间楼”勒勒今朝乔家路234号-244号，伊个正门到底勒啥地方，极少有人讲得清爽。

“最乐堂”遗址

其实，徐光启故居个正门就勒勒现在俞家弄187弄底（也就是原来顾家弄个23弄底）搭仔俞家弄193号（也就是原来顾家弄个25号）迭个位置，此地是太卿坊个原址。讲起搿个“九间楼”，伊是一座朝北个建筑，坐落勒勒原来乔家浜个河浜边浪。按照阿拉江南住宅建造个传统习俗，是勿大可能造一幢大门朝北个居所，伊个正门必定要勒勒朝南个方向。

徐光启出生勒勒徐氏宅院个最后一进楼里，迭个楼原名“后乐堂”。明代末期，清兵南下个辰光，徐光启已经勿勒人世，伊个住宅也烧脱了，剩下来迭个乔家浜，也就是今朝个乔家路最后个迭个一幢楼房，上下各九间，所以，住勒乔家路高头个人侪称搿幢楼叫“九间楼”。徐光启居住勒“九间楼”第三进房子里头。第三进房子个背后是一条浜，呒没多余个地方可以造二进、一进个房子。乃么，迭个二进、一进个房子个位置就必定要造了往南个土地浪。按照迭个逻辑推断，就要往南推进40到50米个俞家弄了。

勒勒俞家弄193号-197号（也就是原来顾家弄个25号），的的确确有一幢二进深个明代宅院，伊个位置勒徐光启故居“九间楼”个前方，是民国时期上海工商界领袖、上海近现代市政建设个奠基人陆伯鸿故居，叫“陆敬德堂”。大家一直勒猜测，“陆敬德堂”迭个一幢明代个建筑到底搞徐光启个房子有啥个关系？种种个猜测，最后勒陆氏家族后人出示个陆氏家谱搭仔房产地图浪得到了证实。“陆敬德堂”正是徐光启祖居个一部分，是徐氏家族个原房产。陆氏家谱里清清爽爽个记载：陆氏先人陆嘉禄，四川成都人，由徐光启劝化入了天主教。伊个孙子、陆氏第三代传人陆兰亭勒勒雍正年间，也就是1723年到仔上海定居，伊从徐光启个后人手里买进了徐氏家族个迭一套宅院，进行重新个改建。陆氏家族个第六代后人陆伯鸿就出生勒此地。勒陆氏家谱里，还有一个重要记载：陆兰亭个妻子，也就是陆伯鸿个曾祖母陆徐氏是徐光启个后裔。

根据《上海徐氏宗谱》记载：徐光启出生勒勒“太卿坊祖宅”。“宅邸东靠太卿坊，北临乔家浜。”毫无疑问，太卿坊应该是弄堂个名字而勿是路名。就像乔家路高头个“乔家坊”“勤慎坊”，包括阿拉上海滩搿地标，像泰康路个田子坊、四川北路个永乐坊、雁荡路个金雁坊一样，侪是一条条个弄堂名字，而勿是一条条个路名。现在俞家弄187弄迭个一条里弄，完全具有太卿坊个特征：全长廿米，宽有五六米，路面原来侪是用花岗岩个长条石铺成个石板路。搿条弄堂个深处，也就是原来顾家弄23弄个左侧还有一条通道，勒勒上世纪五六十年代就可以直接通达“九间楼”。（所以，提起迭个陆伯鸿，到底是何等样人物，阿拉明朝继续。谢谢各位。）

朗读者：何振华

原标题：《《一条乔家路 半壁老城厢》 （三）》

阅读原文