花纹，欢喜得舍勿得吃
原创 孔曦 海上梦叠
花纹，欢喜得舍勿得吃
来源：《新民晚报》夜光杯十日谈
作者：孔曦
沪语改写：高仁
诵读：洪瑛
文字修正：孔曦
推荐：丁迪蒙
一九八几年个辰光，勒中国大陆，到处侪勒勒放邓丽君个歌，有一只歌是搿能介唱个：“我用美酒加咖啡，一杯再一杯”。其实呢，咖啡搭酒勿好一道吃个，勿然要醉脱个。搿个辰光，新娘子个嫁妆里向，假使有一套咖啡杯，葛是相当个懂经。电视广告里向，一句“雀巢咖啡，味道好极了”，搿种速溶咖啡个生意就好得勿得了。家家人家，招待人客个咖啡，大多数是雀巢，再加上“知己”，又浓又香，甜咪咪个，味道确实是好极了。后首来，我第一趟坐勒咖啡馆里吃咖啡，回到屋里向，一夜天睏勿着，再晓得真正个咖啡有多少结棍。从此，夜里向，我再也勿敢碰咖啡了。
到仔两零零几年，卡布奇诺、拿铁、摩卡、焦糖玛奇朵、黑咖啡……一眼一眼变仔大家欢喜个咖啡品牌。然后呢，贵得来要命个蓝山咖啡、猫屎咖啡，也出来了。
据说讲，有一款KL钻石咖啡，就是苏门答腊猫屎咖啡，由正宗个野生麝香猫吃进去，再惹出来，汏清爽，烘干，然后磨好，烧好，是世界浪向最最贵个猫屎咖啡，一杯个价钿，差勿多要三千块人民币。我屋里向养勒几只懒洋洋个草猫，我也曾经转过念头，想自家做猫屎咖啡，搨眼小便宜。后首来，想想清理猫屎个辰光，屏气屏得来蛮吃力个，还是算了。
要讲工艺，手工现磨个咖啡，顶顶时髦。要讲外表，我欢喜咖啡表面拉出来个花纹，欢喜得舍勿得吃脱。
回到上海，阿拉几个小姐妹常庄掼脱手里向个事体，寻一家开勒老洋房里个咖啡馆，到得早个人，可以笃笃定定勒了庭园里向走廊里向摆摆Pose，拍拍照片，发到朋友圈扎扎台型。
有个小姊妹嫁到北欧，伊讲，搭老公出去白相，呒没走几步路，伊位黄头发蓝眼睛个先生，就要坐下来吃咖啡，风景呒没看着多少，咖啡吃仔一肚皮。饭刚刚吃好半个钟头，伊位先生又要去寻咖啡馆了。伊面吃吃白相相个名堂经老少个，啥地方像上海，可以看看话剧看看电影，听听评弹听听昆曲。想吃饭，喊几个要好朋友，广东菜四川菜、山东菜福建菜、浙江菜安徽菜，本帮菜河南菜，还有烧烤、火锅咾啥……搿小姊妹讲，伊面个所谓社交活动，就是到咖啡馆去吃咖啡。顾客之间，慢慢叫、慢慢叫也变仔熟人了……搿搭省略一只捂牢面孔个表情。
另外一个小姊妹，伊是到土耳其去旅游个。导游告诉伊，当地有一句老古闲话：“吃侬一杯土耳其咖啡，朋友好做四十年”。大马路小弄堂，到处侪是大大小小个咖啡馆。伊老兴奋个搭我讲，要讲咖啡个资格，土耳其咖啡可以讲是欧洲咖啡个祖师爷，到现在已经有得靠八百年。1523年，土耳其个一则婚姻法规定：“结婚以后，男方必须确保女方有适量个咖啡可以吃，做勿到个，必须离婚。”勒伊面，咖啡也叫阿拉伯之酒。土耳其人一生毛病，就只吃咖啡，勿再吃别个物事。一旦连得咖啡也呒没用场了，伊就开始立遗嘱。
最近几年，有一股养生个风尚老行个——吃白水。最开始个辰光，我是看王朔编个一部电影再晓得迭个名词。一个拨王朔嘲笑个装时髦个太太，勒飞机浪向搭空姐讲：“我要白水。”害得我笑仔半日天。
现在，除脱仔谈朋友、劈情操，上海个咖啡馆里向，也有交关客人，坐勒包厢里谈生意，或者解决纠纷。咖啡馆也可以“讲吃茶”了。老早仔，迭种事体侪勒了茶馆店里做个。
老实讲，除非是名牌矿泉水，或者是当地个山泉水，自来水烧出来个白开水，口感真个勿灵。平常辰光过日脚，味道本生就淡洁刮答个。
睏势懵懂个下半天，勿妨冲一杯速溶咖啡，多加眼牛奶，多加眼糖，再来一块小巧个西点，提提神，醒醒脑，稍许打只瞌充，然后，就可以抖擞精神，做生活去了。
原标题：《花纹，欢喜得舍勿得吃》