来源于生活个哲理 谈谈俗语

原创 俞颖（沪语改写） 海上梦叠

来源：网络

沪语改写、朗读：俞颖

指导推荐：丁迪蒙

我伲勒日常生活当中，经常会得听到一些民间俗语，有眼俗语听起来邪气贴近生活，闲话相当简单，也老容易理解。

俗语一般侪是有上下两句组成个，但是我伲经常听到个勿是只有上半句，就是只有下半句，所以交关俗语意思侪勿完整。

今朝为大家分享一句俗语，上半句就是“饱暖思淫欲”，搿句闲话其实老好理解个，意思就是人勒吃饱穿暖之后，思想就歪脱了，开始想一眼勿正经个事体。其实下一句再是经典，揭露人性，但蛮少有人晓得，关于伊还有一只故事唻。

据说老早有一个姓陈个大户人家，老来生了一个囡儿，邪气开心，对囡儿也是宝贝得不得了。还请来教书先生教伊读书识字，搿位陈小姐也邪气争气，老有学识，成为当地个一大才女。随勒陈小姐一天天长大，到了婚嫁个年龄，也呒没寻到一个如意郎君。最后陈小姐想出一个办法，就是出对联招亲，伊出一个上联，假使有人能对出下联，葛末就嫁拨伊。

陈小姐出个上联就是：“饱暖思淫欲”。迭个消息传出去以后，交关人侪来轧闹猛，侪想对出下联，讨到才貌双全又家财万贯个新妇。搿个上联虽然只有短短个五个字，但是下联也老难对个，最后还是一个风度翩翩个才子对了出来，下联就是：“饥寒起盗心”。就迭能，郎才女貌，结成一对良缘，传作一段佳话。

“饥寒起盗心”个意思就是：人到了饥寒交迫个辰光，就老容易产生偷盗个邪念。其实搿一整句俗语，虽然闲话十分简单，但是总结出了人勒顺境搭仔逆境当中会产生个一些邪念，搿侪是对阿拉后人个一些警告。

搿句俗语勿仅仅讲个是吃饭问题，而是勒勒提醒我尼，勿管是处于顺境还是逆境，侪要坚守牢自己个本心，坚持做人个原则，勿能失去最起码个底线，更勿能拨眼门前个困难所吓倒，而是要通过自己个智慧搭仔双手，重新振作起来，走出困境。勿要为了想要个物事，出卖自己个灵魂。

老祖宗流传下来个搿些俗语对我尼做人是邪气有帮助个，多读读，大有好处，可以让人少走弯路。

朗读者：俞颖

原标题：《来源于生活个哲理 谈谈俗语》

阅读原文