海上叠梦：伞来伞去

刘时医 上海老底子

伞来伞去

作者：辛旭光

沪语改写：叶雁

朗读：刘时医

推荐：丁迪蒙

点击下方收听音频，时长9分27秒。

又到了夏秋多雨个季节，常庄会得想起搿些曾经勒海手里个洋伞，老奇怪个是又忘记脱伊拉到阿里搭去了……伞来伞去，搿些洋伞会勿会怪主人个勿珍惜？只有勒落雨天侪会得有急吼拉吼个寻搿把洋伞柄个真实感觉。

第一把伞是父亲拨个，伊个辰光是60年代，弟兄几个侪要读小学了，每人一把，一律个油布竹伞，勿用个辰光就扛勒肩浪向像煞是武器，有浓浓个桐油味。每年到了三伏天，大人叫侬撑开以后，自家用布拿桐油再搨一遍伞面，摆勒太阳下头狠狠叫个晒干。直到我读好小学，原来个黄颜色伞面变成了焦黄颜色，但还是粗壮结实。伊也是男小人用来白相、打相打个道具，同学之间常庄用伞骨去戳对方个伞面，搿个是邪气激烈个生活。拨戳了之后回到屋里向就要吃顿生活，伞高头有交关难看个补丁是邪气退招势个。第一把伞捏手个地方是段木棍，唯一特别个是父亲用工整个正楷写个并刻了自家名字，勒伞面浪又写了“辛置”。小辰光我一直勿晓得是啥意思，大了再晓得是“辛家购置”个意思，原来啊，伞勒当年也是一家人家个重要个财产。

成长当中个男小人是勿需要伞个，伊拉拿淋雨作为勇敢个必修课。插队落户辰光，淋勒雨里向做生活更加属于家常便饭，蛮奇怪个是，伊个辰光勿大感冒个。直到有一日我读到本小说：“雨中撑伞的情侣是一道风景”，突然觉着需要一把合意个洋伞了——搿已经是1977年，我考上大学。学堂附近刚好勒海举行龙华庙会，有交关处理商品卖，刚好有当时上海最时髦个黑布、皮弯柄个洋伞，我老开心个买了一把，希望伞下头有心上人陪勒海。但是，后首来是否真个撑过伊个女小囡我已经忘记脱了，反正勿是初恋个搿个。至于搿个第一把自家买个伞啥辰光没个，也呒没任何印象了。只晓得用了四块八角，而原价要八块洋佃。是自家省下来一个号头又三分之一个饭票铜佃买个。

我最欢喜个一把伞来自德国。90时代初到柏林一家银行参加培训研讨会，搿日天东道主请大家看邪气有名个“BEE BEE”（蜜蜂组合）露天音乐会。德国热天介经常有阵头雨，就发了柄大洋伞，足足有得95公分长，为啥我会得记牢搿个数字？因为伊把伞质量老好个，不锈钢骨架、半自动个，收放自如，手柄是葫芦串个造型，最后一个球体有得鸡蛋大小。绝对是洋货、又是德国货，一定要带回屋里个。可惜，我个大箱子长度只有80公分，即使对角放，还要长5、6公分，葛为啥勿绑勒箱子外头？一方面是担心拨折断，更加吓拨老外嘲笑；男子汉一定有办法个！我看到德国冻肉刀是锯齿状个，可以买回来当礼品，先利用伊拿柄截脱一眼！后首来，我勒宾馆里向做了类似于小辰光削陀螺个生活，又是削又是锯，花了一个钟头，拿手柄浪向最后只球锯下来，邪气顺利个拿伞摆进箱子，带回了上海。迭把德国伞真个大，老婆、小囡侪撑进去也绰绰有余，回头率忒高了。特别是蓝眼色伞面浪一溜金黄色个英文、搭仔柏林银行个徽记让老扎台型个！可惜几年后，忘记勒公交车浪，搿个也是唯一一次追到公交总站去寻个：但好物事是人人喜欢个，寻勿回来，希望有好人家继续用伊伐。搿个也是唯一晓得个一把伞是哪能离开个。

后来，我勒银行工作，经常拿洋伞作礼品去馈赠客户，实用而勿张扬。十年前头母亲过世，我悲伤之余，想用种方式来纪念母爱个无私，寿碗、寿巾之类个忒俗气，想想，还是洋伞能够表达心意：表示长辈一直勒庇佑后人。伞又是实用物品，可以让用个人时常记取。搿能介，就定制了100多把寺庙黄个颜色个洋伞送拨来送别个亲眷朋友。伊日天，拨舅妈悄悄叫拉到一边，讲：“伞是散个谐音，妥当伐？”我解释：“已经呒没办法再改了，阿拉心里向个感谢搭仔善意最最重要！”实际浪向，伊日天大家侪愉快个接受了，没来个人也一家人家一把拨其他人带转去了。后来，勒小镇浪偶然看到迭柄黄洋伞勒雨中飘动，心里向总归是特别个欣慰，还是真心善意最最重要！

勿久之前送别了娘舅。做“五七”个搿个夜里向，屋里人拿伊最欢喜个物事一样一样个烧脱拨伊。无意当中，我又看见了搿把黄洋伞，拨悄悄个摆勒坐椅浪一一化为青烟、跟牢主人了去——或许，搿个是伊拉姐弟重逢聊天个话题伐。

伞来伞去，张开个辰光伊承接了雨珠快乐个敲打，收拢个辰光伊寂寞自在无语；埃些伞下头个切切蜜语，埃些相依共济个身影，侪会得勒无数个雨季重新演绎；聚散随缘，有些故事或许还会得提起，但未必还是侬个故事，而伞个故事却还会得继续……

（朗读者近照）

来源：“吳越小豬”公众号

上海老底子

每天为侬送上精彩文章一组

打开尘封的记忆，寻觅往昔的岁月

叙上海老底子事

忆上海老底子人

诉上海老底子情

以史明志，以启未来

原标题：《【海上叠梦】伞来伞去》

阅读原文