沪语：自家灶头个饭，好吃
来源：新民晚报
作者：孔曦
沪语改写：边秦翌
沪语讲述：丁曙立
文字、语音审核：丁迪蒙
编辑：王乙其
老古闲话讲，隔灶头个饭好吃。小辰光，因为忘记脱带钥匙，勒贴隔壁个老太公屋里吃过一顿饭，觉着伊拉屋里个芹菜豆腐干肉丝老好吃个。十几年前头一个春节，亲眷朋友到阿弟开个农庄吃饭，菜势新式又好吃。我穷吃八吃，吃得忒多，回到屋里向就开庎橱门了，勒床浪睏仔几天，耽误了拜年，拨朋友笑话。囡儿帮我点过一趟外卖，是一小碗皮蛋瘦肉粥搭仔酱菜。搿是唯一个一趟外卖留拨我个好印象。之前之后，我也吃过伊点个外卖，每趟侪忒咸，忒鲜，忒油，再加上麻、辣，颜色看上去也邪气深。
医生个养生忠告里，老是提起覅吃得忒咸搿句闲话。饭店大菜师傅个窍槛之一，是“无盐勿鲜”。或许，养生搿桩事体，只有到了中老年再会得当心，小青年是根本无所谓个。交关辰光之后，我再晓得，90后个舌头，老早就拨肯德基麦当劳之类个快餐吃坏脱了。呒没食品工业个调味品，吃得清淡一眼，对伊拉来讲，赛过上刑罚。
除脱好吃，外卖还有个好处，就是便当。一眼一进灶披间就手忙脚乱个朋友，老欢喜个。
讲到外卖，我肚皮里总归要咕两句。食材搭仔配料个安全，阿有保障呢？踏踏滚个饭搭小菜盛勒塑料碗里，阿会产生有害个物事呢？吃外卖个辰光，阿会得拿塑料微粒子一道吃到肚皮里去？一次性餐具用介许多，拨环境增加了多少负担啊？……
2016年年底，我到囡儿读书个法国尼斯探亲，顺带便到欧洲个几个旅游城市白相。勒离开尼斯26公里个摩纳哥，我搭囡儿参观海洋博物馆。从海洋博物馆出来，旁边有爿勿大个展厅，陈列内容是塑料污染对海洋个危害。海滩浪堆积个泡沫饭盒子、死脱个海鸟肚皮里侪是废塑料、拨塑料薄膜绕杀个海龟……看得来心惊肉跳。甚至，勒一万米深个海底，也有“轻飘飘”个废弃塑料袋。比丝绸还要软、比钢铁还要硬个塑料，勒方便人个同时，也像水银泻地一样，破坏人类赖以生存个地球生态。有研究结果证明，伊眼漂浮勒海洋里向，一眼一眼碎脱个塑料，最终会得碎成功微米到纳米级个微粒，进入生态循环。伊拉勒勒水、空气搭土壤里，吃饭，吃开水乃至呼吸，侪会得吃进去。
几乎每一种人工合成个物事，勒提供便利个同时，侪勿可避免个伤害大自然，并且最终伤害人本身。
因为前头讲个介许多原因，我几乎勿点外卖。勒单位吃食堂，勒屋里自家烧。按照哪能便当哪能来个原则，荤素搭配，保证营养就可以了。鱼，撒薄薄一层盐，稍微腌一歇，空气炸锅炸十几分钟，原汁原味，营养丰富；春笋上市，烧一镬子腌笃鲜，荤素齐全；炒青菜炒菠菜煠生菜、什锦烤麸、芹菜炒肉丝、青椒茭白炒肉丝咾啥……灶披间里，蓼茸蒿笋试春盘，人间有味是清欢。有美味，也有诗意。东坡肉，就是大诗人苏东坡第一个烧出来个。
春风送暖，小小个花园里，几丛马兰头又铺展出绿茵了。我准备抽空拿伊拉摘下来，汏清爽，斩两刀，配豆腐干丁，拌一盘春色。另外，丝瓜个种子，也应该种下去了。
作者：孔曦
丁迪蒙
迪蒙，启迪蒙昧者也。上海市人。原上海大学中文系教师，多年来一直致力于沪语和海派文化的传承。沪语是吴方言的代表方言，是吴侬软语的典范。她既可以用来拉家常，也同样可以用来朗读各类诗歌散文。沪语完全可以书写，同粤语可以写作是一样的。本平台所有文章都是经过改写后，用沪语来演绎的，汉字书写也是正确的。
丁迪蒙所撰写的，与沪语相关的著作主要有：
《学说上海话》上海科技文献出版社
《听听说说上海话》少年儿童出版社
《实用沪语》复旦大学出版社
《上海话绕口令》少年儿童出版社
《上海方言词语使用手册》上海教育出版社
《上海话读成语故事》少年儿童出版社
《囡囡学童谣》，少年儿童出版社
《囡囡学成语》，少年儿童出版社
原标题：《沪语：自家灶头个饭，好吃》