沪语悦读：三上莫干山

海上梦叠海上梦叠官方澎湃号

2024-07-01 16:35

上海

来源：新民晚报

作者：郑自华

沪语改写、讲述：潘庆纽

文字、语音审核：丁迪蒙

编辑：王乙其

我第一趟到莫干山去，是1982年10月份，中秋个辰光。伊个辰光是只晓得疗养勿晓得啥个叫旅游个年代。我对莫干山个一眼眼了解，就只晓得伊是“清凉世界”。

阿拉开了部两吨头个卡车勒莫干山附近装货，想起伊句“走过路过勿要错过”个闲话，就拿车子一记头开上去了，没碰着任何阻挡。

1991年单位安排到莫干山去开会，搿是第二趟去。几经变迁，当年团体照里个几十个人，大部分侪失去联系了。

今年七月底我第三趟去，现在莫干山对外来车子管理得邪气严格，自驾车一律要停勒景区外头，再乘景区车子进去。

今年到莫干山去，正好有台风袭击大陆沿海地区。虽然浙江勿是正面目标，但是勒莫干山还是好感受到台风个威力个。

搿天下半日，落暴雨了，地面邪气潮湿，连楼梯扶手也是潮唧唧个。蹲勒宾馆里向勿好出门，我就拿勒1982年勒莫干山拍个照片，请宾馆前台服务员认认看。41年前个照片还是黑白个，拍个水平也勿高，焦距勿准，光线暗来西，清晰度也勿来三。好在照片背后头侪有拍个辰光，地点，为后首记起来提供方便。服务员看到照片侪呆脱唻。照片年纪比伊拉还要大，伊拉讲勿出啥来。乃么又叫来保安柏师傅。

柏师傅50岁，皮肤墨黜黑，是勒此地土生土长个，对搿搭个草木伊侪熟悉。我拍个照片，伊看得开心煞了。柏师傅一面指挥外来车辆停放，一面点仔照片讲：㑚吃饭个搿只荫山饭店，已经拆脱重造过唻。当年个“观瀑厅”、“观日台”侪勒海，现在是打卡个热门景点。

1982年去，只晓得风景优美，是有名个避暑胜地，对民国别墅群一眼也勿晓得。我当年勒莫干山新华书店买个浙江人民出版社1980年出版个《莫干山导游》，书里向没提到过名人别墅。搿些年名人别墅群个名气是响得来，拨誉为“世界近代建筑博物馆”，2006年国务院公布是第六批全国重点文物保护单位。环绕景点个观光车兜一圈要半个钟头，旅客来了没勿去个。