沪语悦读：陕西北路美新点心店个十年
来源：老周望野眼
作者：周力
沪语改写：朱枫
讲述：薛南平
文字、语音审核：丁迪蒙
编辑：王乙其
上海闲话里“新”搭“心”读音一样，有辰光就会得混淆。譬如，同样是“美Xin”，当年开勒陕西南路淮海路个美心是酒家，做粤菜个。美心“黄鹤一去不复返”，先是搬到华山路新路达商厦，后来索介呒没了。搿只1924年成立个老品牌，大概勒九十来岁辰光寿终正寝，呒没能够迎来百年诞辰。
而陕西北路威海路个“美新”点心店，本来只是爿汤团店，历史也比陕西南路个“美心”晏了一年，却碰着了好辰光、好机会，勿光开得蛮好，还成为了陕西北路浪个“网红”，成为百年老店指日可待。除脱仔汤团，面条、馄饨、春卷、糕团、粽子……倒像煞是上海老式点心个嘉年华，常年有人排队，每到饭点客人更加是潽进潽出，壮观程度或许可以搭淮海路浪大名鼎鼎个光明邨拗拗手劲了，让南京西路浪另一家老字号王家沙“望洋兴叹”。
前两日整理旧照片，寻着一张十年前头，2013年11月份勒美新点心店吃汤团辰光拍个价目表，时间赋予迭张照片意义，看看当时个定价还是蛮好白相个。我无意讨论各种生活指数，伊个是经济学家个事体。拿搿两张照片摆勒一道，让每个人自家去理解伐。只好讲：2013年到现在，十年个样子，美新点心店搭我伲各自个生活，侪改变了勿少。
伊个一日，搭朋友一道到美新去，已经过了饭点。我个老规矩，甜咸汤团各一客，面条馄饨倒是次要个。尽管勿是黄金时段，但买票排队、等位排队，还是免勿了个，好像也算是某种仪式感伐。
好勿容易吃着了，坐勒对面个老爷叔个炸猪排，小骨头嵌勒辣假牙齿里，筷子头、牙签、手节头侪用了，还是勿来三。爷叔一狠心，整排个假牙卸下来，细心个用食指捋清爽，再用舌头细心个舔干净牙床，装好假牙继续品尝伊个炸猪排……迭个辰光，我碗里还剩两只汤团，过来辰光肚皮里还咕噜咕噜叫，勿晓得哪能，辣末生头就勿想吃了。我推开等了老长辰光再端上来个小碗，离开好勿容易坐上去个凳子，匆匆个走出美新，朝南京西路方向过去。
忽然一抬头：又看到了迭家店个招牌：“中桑”，勿晓得阿里一位老板起个名字。朋友讲：搿是家台州个企业，廿几年历史，勒陕西北路浪营业已经有得交关年数了。中国桑作织物，呒没毛病。
不过……不过……上海人用上海闲话读起来，总归有点刮三个。就是勿记得搿家店开勒此地，是否有得十年了……
作者：周力丁迪蒙
迪蒙，启迪蒙昧者也。上海市人。原上海大学中文系教师，多年来一直致力于沪语和海派文化的传承。沪语是吴方言的代表方言，是吴侬软语的典范。她既可以用来拉家常，也同样可以用来朗读各类诗歌散文。沪语完全可以书写，同粤语可以写作是一样的。本平台所有文章都是经过改写后，用沪语来演绎的，汉字书写也是正确的。
丁迪蒙所撰写的，与沪语相关的著作主要有：
《学说上海话》上海科技文献出版社
《听听说说上海话》少年儿童出版社
《实用沪语》复旦大学出版社
《上海话绕口令》少年儿童出版社
《上海方言词语使用手册》上海教育出版社
《上海话读成语故事》少年儿童出版社
《囡囡学童谣》，少年儿童出版社
《囡囡学成语》，少年儿童出版社
原标题：《陕西北路美新点心店个十年》