沪语悦读：卖书送菜谱

上海老底子上海老底子官方澎湃号

2023-08-14 15:30

上海

上海老底子每天呈送精彩文章一组

打开尘封的记忆，寻觅往昔的岁月

叙上海老底子事忆上海老底子人

诉上海老底子情

卖书送菜谱

来源：新民晚报

作者：沈嘉禄

沪语改写、讲述：周红缨

文字、语音审核：丁迪蒙

编辑：王乙其

我拿美食散文精选集《亲爱的味道》送到上海文化出版社，编辑老师一致称好，选题老快就获得通过了。进入编辑流程，编辑老师建议加点料，“侬勿是勒屋里经常烧菜个吗，有得私房菜谱伐？公开一下，大家分享。”于是，临阵磨枪，马上编一本别册。有些菜做过也吃过，但呒没有留下来图片，就要重新做一遍。有些食材勿是当季个，就要动脑筋去采购或者寻找替代品，反正手忙脚乱。老婆吃现成个，还要勒旁边冷讽热嘲。勒伊个地盘浪混，只好让让伊伐。

上海男人勒“屋里向”买汏烧，一直拨北方男人冷嘲热讽。上海男人并勿在意，面朝大海，关心粮食搭仔蔬菜，还有油盐酱醋。会得做家务，是上海男人个本色，也是一生个修为。无论勒大杨浦做过混世魔王，还是勒太平桥冒充过南货店小开，勒做家务搿桩事体浪侪是能够共情个。兜兜小菜场，讨价还价，老姜新葱，弥陀芥菜，紫茄白苋，咸肉菜饭，韭菜搨饼，蛤蜊炖蛋……我伲搿一代经历过短缺经济时代个男人，懂得生活个勿容易，又要维持上海人个面子，所以捋起袖子做家务个辰光，心里是有点委屈，有点悲壮个，但转身勒邻家小妹面前，展现个却是满满个自豪。欢喜做家务，就是热爱生活，体贴老婆嘛！

穷人家个小囡早当家，环境决定人，也好磨炼人。拿我自家来讲，就像孔夫子所讲个：“吾少也贱，故多能鄙事。”木工、电工、油漆工，再踏只缝纫机啥个，侪难勿倒我，葛末，搭锅碗瓢盆打交道，也就是顺理成章个事体。青菜老卜翻花头，做出一道道让爷娘惊喜个菜肴，搭庸常个生活一点点小确幸，身居陋巷，勿改其志。到了廿岁出头，我就好烧一台子家宴了，糖醋小排、本帮酱鸭、酸辣凤爪、水晶虾仁、糟熘鱼片、黑椒牛柳、茄汁鲳鱼……侪是“小开司”。亲眷朋友送拨我一两句鼓励性质个表扬，勿免得意洋洋。

成家之后，老婆希望夫君专心笔耕，事业有成，连一棵葱也勿让我碰。后来看我基本没戏，就下放部分权力，让我体会一下当家人个酸甜苦辣。另外一方面，也让我调调脑子，松松筋骨，整天钻勒书堆里，讲勿定阿里一天就变成戆大了。

后来，随牢仔上海餐饮市场个繁荣繁华，朋友请我吃饭个机会与日俱增。酒肉穿肠过，美味心中留。人家会得做，我为啥勿会做？于是，就时勿时个问大菜师傅偷个几招，回到屋里试勒海做做看，赛过瞎猫捉死老鼠，倒也有得三分像了。久病成医，久吃成仙，后来，我还好搭饭店老板支个招，帮伊拉一道研发产品。特别是搿几年，我也会勒微博搭仔公众号浪透露一些秘诀，好伐，老快就拨人家拿去转化为生产力。迭个嘛，我当然勿会憨到搭人家要版权费。能够促进行业发展，推动市场繁荣，我深感荣幸。

廿几年来，我为了撰写美食文章花了勿少辰光，报刊浪个专栏也开了好几只，出了几本书，每年还要做美食文化讲座，担任过多家美食榜单个评委，现在还是上海市餐饮烹饪行业协会本帮菜工作委员会首席高级顾问。一面是知味客，一面是键盘侠，大幅度个跨界也让我勒纷繁个世界里获得了勿少乐趣。

动静逐渐大了之后，就有朋友怂恿我开饭店，至少也要开家兼营酒菜个小面馆，甚至要发起众筹。不过呢，我有自知之明，饭店勿好开个，面馆也勿好开，做直播带货肯定是荒腔走板，电视台到我屋里录节目，只好婉拒再婉拒。我呒没经商、表演，还有搭有关方面周旋个才能，更加勿敢折腾钞票，啥人个钞票侪是钞票，对勿对？姆妈老早就警告过我：侬勿要顶仔磨盘过独木桥。

葛末，我就抱定自娱自乐个心态来研究饮食文化，假使讲有啥个微言大义，搿纯粹是芝麻落进针眼里，碰巧唻。不过，亲朋好友个鼓励，至少拨了我继续革命个勇气，勒屋里我常庄练练手，烧几道菜传到朋友圈里炫耀一下，每趟侪好赢得成百上千个点赞，个别同志还要起哄，提出到我屋里来“搭伙”。趁迭趟新书出版个机会，我就晒几份菜谱请大家指教。

别册里个廿六道沈家私房菜，既呒没山珍海味，也呒没燕翅参鲍，就是小菜场、超市里常见个食材，石库门灶披间里端出来个家常味道。我还悄悄叫夹了一眼“私货”，就是从小吃惯个故乡风味，比方霉干菜、倒笃菜、黄鱼鲞、家乡肉、猪油渣之类。我伲老百姓过日脚，食材要安全，烹饪要简便，味道要乐胃，气氛要轻松。吃到好物事，涌上心头个就是想念与感恩。

赶勒让人讨厌个梅雨季之前，新书闪亮登场。侬越是担心个事体越是来得快，交关朋友拿到我个新书之后，首先打开个，就是迭本《沈家私房菜》，拿“正宫娘娘”摆勒边浪，拿我气得来：搿勿是明目张胆个买椟还珠嘛？