沪语悦读：想起了老里八早上海滩个冷饮
2023-08-02 15:57
上海
原创 王国杰 海上梦叠
作者：王国杰
沪语改写：飞飞
沪语讲述：何振华
文字、语音审核：丁迪蒙
编辑：王乙其
老里八早个上海滩，有小贩背了木头箱子穿家走巷，一边用木块“啪、啪、啪”敲木箱，一边勒喊：“美女牌棒冰唻！药水棒冰要伐？”哎！或许有人会讲，“还有药水棒冰？侬勿要瞎三话四噢！”奈末我要讲，毛估估，现在七十岁勿到个老人也勿晓得搿种药水棒冰是啥个物事了。其实埃是一种防中暑个棒冰，是用防中暑个痧药水加点糖水做成功个棒冰，因为有药水味道，勿好吃，卖勿脱，后来就勿生产了。
其实上海最早最有名个棒冰勿是光明牌棒冰，而是美女牌棒冰。迭种棒冰是1926年美国个“上海海宁洋行”生产个。伊拉推销个办法就是让小贩背仔木头箱子装好棒冰，勒勒棒冰高头盖好棉花胎，再盖好箱子盖头。然后用木块一边敲木箱、一边穿街走巷叫卖。
还有一种是土棒冰。埃歇辰光有些老百姓穷得连美女牌棒冰也吃勿起，小囡就买土棒冰。土棒冰勿是棒冰厂做的，而是马路摊贩当场现做现卖个，小辰光我也吃歇过个。埃歇辰光，阿拉弄堂口就有搿种做土棒冰个冷饮摊。要晓得老早是呒没粉碎机个，小贩是拿冷库里运来个机器冰用木榔头敲成冰屑，再拿冰屑摆勒茶杯里，摆一眼红丝、绿丝，还要浇一眼冷开水，再勒勒茶杯当中插根棒头，最后压压紧。等脱一歇，冰屑开始慢慢凝结成冰棍了，然后，连棒头带冰棍一道拔出来。搿能一来，一根土棒冰就做好了。吃个辰光，冰屑还会悉悉索索落下来。现在看来，其实就像刨冰。
再搭大家讲讲老早个汽水。老上海个汽水勿叫汽水，老百姓叫伊荷兰水。为啥叫荷兰水？汽水跟荷兰有啥搭界？搿末我又要解释一番了。民国时期，英国人勒上海开了一爿“正广和”汽水厂，迭个厂经销荷兰制造个汽水，奈末老百姓侪叫伊荷兰水了。讲到搿得，我讲个插曲。埃个时代个正广和汽水瓶，上海人勿叫伊汽水瓶，叫伊红毛瓶。为啥？因为汽水是荷兰生产的，勒搿个时代，老百姓看到荷兰人个头发是红的，觉得交关怪，奈末，大家侪拿搿种汽水瓶叫红毛瓶了。我个宁波阿娘（祖母）烧菜个辰光常庄会喊：“红毛瓶呢？囥勒阿里去啦？”其实伊是勒勒寻装酱油个汽水瓶。
讲述：何振华丁迪蒙
迪蒙，启迪蒙昧者也。上海市人。原上海大学中文系教师，多年来一直致力于沪语和海派文化的传承。沪语是吴方言的代表方言，是吴侬软语的典范。她既可以用来拉家常，也同样可以用来朗读各类诗歌散文。沪语完全可以书写，同粤语可以写作是一样的。本平台所有文章都是经过改写后，用沪语来演绎的，汉字书写也是正确的。
丁迪蒙所撰写的，与沪语相关的著作主要有：
《学说上海话》上海科技文献出版社
《听听说说上海话》少年儿童出版社
《实用沪语》复旦大学出版社
《上海话绕口令》少年儿童出版社
《上海方言词语使用手册》上海教育出版社
《上海话读成语故事》少年儿童出版社
《囡囡学童谣》，少年儿童出版社
《囡囡学成语》，少年儿童出版社
原标题：《想起了老里八早上海滩个冷饮》
特别声明
本文为澎湃号作者或机构在澎湃新闻上传并发布，仅代表该作者或机构观点，不代表澎湃新闻的观点或立场，澎湃新闻仅提供信息发布平台。申请澎湃号请用电脑访问https://renzheng.thepaper.cn。