夜饭吃好写夜报
原创 袁念琪 上海人家AB面
图说：《新民晚报》2022年1月2日。小辰光，快要吃夜饭了，一看到邮递员骑仔脚踏车进弄堂，就会搭仔一帮小人喊：“新民夜报，夜饭吃饱。”其实夜报来个辰光，并不是家家人家才夜饭吃饱吃好了；而是心里向晓得，夜饭吃饱就可以看夜报，品尝精神食粮了。
长大了，夜饭吃好，除脱看夜报还写夜报；写夜报就是向夜报投稿。自家名字第一趟登上夜报是1983年4月2号：《姑娘们在洪水中携手》，介绍刚拿到全国中篇小说奖个《燕儿窝之夜》。发稿编辑是大学校友林伟平。
写夜报稿子，主要写拨新闻搭仔副刊。我辣夜报浪发表个第一篇新闻是《一枚奖章的“奇遇”》，日脚是1984年4月13号。讲阿拉黄泽同乡、著名越剧表演艺术家范瑞娟阿姨个事体。银行发现回收个贵金属里，有范阿姨1954年华东区戏曲会演一等奖个奖章。
图说：著名越剧表演艺术家范瑞娟给银行同志讲述奖章由来。稿子拨了武璀阿姨，伊讲：夜报就要搿种稿子，读者欢喜。闲话里个意思，就是1982年元旦《新民晚报》复刊辰光，社长赵超构辣《复刊的话》中提出夜报要做“穿梭飞行于寻常百姓之家的燕子”。
图说：范瑞娟写给本文作者的信。三天以后，我个稿子第一趟发表辣《夜光杯》浪：《在茄克衫潮流中》，责编是周骏。有电视台同行看了讲：夜报胆子介大，提出茄克衫与牛仔裤最嗲搭配。
图说：文章署笔名，只因当时个头不欢喜人家写外稿。勿要搞错，阿拉是上海人呀。美国人霍塞老早就辣1940年出版个《出卖上海滩》里讲：“上海乃是中国全国的时装中心，上海所通行出的式样是全国所奉为圭臬的”。辣相当长个一段辰光里，上海卖衣裳个营业员往往搿能介对外地人讲：“侬放心买，阿拉上海小姑娘才穿嗰。”
前年春节，责编徐婉青来约稿：写适合《夜光杯》风格、选1988年上海人抗击甲肝一个点。结果，有了拨澎湃、新浪、腾讯等勿少媒体转载个《一餐饭里的智慧和信念》。
图说：《新民晚报》2020年2月18日。埃歇辰光，我负责上海电视台《小菜场·商情·气象》专栏；首办电视“最佳年夜饭征集”。正当录制10套入选“最佳年夜饭”个辰光，甲肝疫情严峻，每天新增病人超过1万，但节目照录勿误。王德民观众“经济宴”4冷盘、6热炒、1汤1点心，关键是一鸡四吃、一鱼三吃、一猪肉两吃，邪气经济实惠。辣了一只只菜里，倾注了一个个普通人对生活个热爱搭仔乐观，显露出一份坚强。
眼睛一刹，“夜饭吃好写夜报”已经三十九年了。拙作《上海人的黄鳝菜》搭仔《淮海中路1号》，分别收进《爱夜光杯爱上海·2019》搭仔《爱夜光杯爱上海·2020》。我还有幸拨评为2020年度夜报优秀作者。写道搿搭，辣心里讲一句：谢谢夜报。
袁念琪：1978年从农场考入大学，获法学士学位。1983年考入上海电视台，高级编辑(专业技术二级），获上海长江韬奋奖，上海市作协会员，入选《中国新闻年鉴》。1974年发表作品，获全国报纸副刊作品年赛一等奖，收入王蒙主编《中国最佳散文》。著有《上海品牌生活》、《上海门槛》、《上海姻缘》、《上海B面》和《零食当饭吃》等。
原标题：《夜饭吃好写夜报》