原创 周力 海上梦叠
作者：周力
沪语改写、讲述：边秦翌
推荐：丁迪蒙
我个老同事、“新闻联播”个主播潘涛一个勿当心变成功网红了，大概主要原因是伊用上海闲话读了小说《繁花》开头个一小段。有人就要来寻伊个呴势了呀，又是讽刺又是嘲笑，讲来讲去，无非是讲伊个上海闲话勿标准。其实按照我个标准来看呶，啥地方是勿标准啊，简直就是“七里缠到八里”，差得远唻。但是，考虑到人家是四川籍北京人个身份，好像要求又勿能忒高。讲上海闲话末，是要鼓励个；假使音讲得勿准，该探讨还是要探讨探讨个，对伐。勒勒介许多个声音当中，有得一位朋友问了一只邪气好白相个问题：上海闲话里潘涛迭个“涛”字，侬读得对伐？我想迭个问题对交关上海人来讲可能勿是问题，但是问题就齐巧出勒所谓个勿是问题浪。潘涛个“涛”字，上海闲话准确个读音勿是“tao”，是“dao”，譬如讲，今朝是双十一，侬用淘宝买物事了伐？对个，涛个发音有眼像淘宝个迭个“淘”字。㑚勿相信啊？呒没问题，阿拉可以一道去翻翻书袋呶。
“涛”迭个字，是三点水加一个“寿”字，伊是形声字。一眼望过去，“寿”字弯弯曲曲个，像煞是老人面孔浪个皱纹，一个人只有走过漫长而曲折个人生道路，再能称得上“寿”；一条河浜要有得迂回上落，再会得形成波涛。所谓波涛，涌起来是波，落下来是涛。《讲文解字》里向有得解释个：涛，大波也。关于涛字个读音，《康熙字典》引用了好几部韵书，像《唐韵》、《集韵》、《韵会》、《正韵》咾啥，总结出来迭个字是“徒刀切”，音“陶”。实际浪，勿单单上海闲话，就算是勒勒整只吴语地区，“涛”迭个字侪是读成“陶”个；搿歇，“陶”变成功了“掏”，毫无疑问是受到了普通闲话个影响。我有得两个朋友，名字侪叫做“世涛”，一位是八十多岁个老先生，苏州人，伊每趟仔做自我介绍，侪是标准个自称“世陶”，乃末大家侪用标准个发音来称呼伊，世陶兄、世陶爷叔咾啥。还有一位，伊个年龄搭我差勿多，生勒上海，祖籍是阿里就勿大清爽了，从小到大，大家侪叫伊“世掏”，伊自家从来呒没提出过异议，假使有人叫伊“世陶”，我想伊头也勿会得回个，肯定勿觉着人家是勒勒叫伊呀。毛宁有得一首歌蛮有名个，叫做《涛声依旧》，我想勿大会得有上海人读成“淘声依旧”伐。还有，浦东个张江有得一条松涛路，要是叫差头司机到 “松淘路”去，讲勿定人家司机还以为侬要去拨啥人送淘箩唻。前一抢滑稽明星个八卦新闻邪气多，反正有得一个叫“涛涛”个人也是蛮有故事个，假使拿迭个“涛涛”读成功“淘淘”，葛末真个是滑稽了呀。
“涛”迭个字准确个发音是“陶”，因为时代个变迁，大家侪读成功了“掏”，我觉着搿也是大势所趋伐，好像也呒没啥个必要硬劲去纠正个。就像我个同事潘涛，假使侬一定要叫伊“潘陶”，搿也是有眼怪个。干脆，让八十岁个世涛照样做伊个“世陶爷叔”，让四十岁个世涛也照样做伊个“世掏兄弟”，大家各自清爽就算了。至于韵书浪是哪能介写个，上海闲话播音员是哪能介读个，搿眼问题统统留拨勒专家们去考证好唻。语言是流动个，一眼古字古音真个退出历史舞台，搿也是呒没啥个办法好想个。
回过头再去讲潘涛个“涛”字，或许“陶”迭个音，若干年之后也会得成为古音，只有勒勒戏曲曲艺里向再能够听得着了，要“涛声依旧”，恐怕是难上加难。既然已经是旧船票，惊涛拍岸，也就呒没必要了伐。
作者：周力
讲述者：边秦翌
推荐：丁迪蒙
原标题：《“涛”迭个字，侬读得对伐？》
阅读原文
