原创 薛理勇 海上梦叠
来源：魔都白领群
作者：薛理勇
改写：郭莉
讲述：刘时医
审阅、推荐：丁迪蒙
编辑：王乙其
宋代孟元老个《东京梦华录》，是本专门记录北宋都城汴京，也就是现在河南开封个城市风俗个著作，因为伊是研究中国北宋风俗、物产个重要材料，所以后世个人经常要引用搿部著作。
勒搿本书里，几次提到过一种叫做“冷淘”个食品。
譬如卷四《食店》里向讲：大个吃食店叫做“分茶”，一般有头羹、白肉胡饼、软羊、大小骨……桐皮面、姜泼刀、回刀、冷淘、棋子、寄炉面饭咾啥。
还有卷六《元宵》里向写：要过年了，官府勒冬至辰光就邪气闹猛个搭好各种棚棚，还面对宣德楼竖大牌子。正月十五元宵，街浪向游人聚集，两边房檐走廊下头侪是各种奇术异能，歌舞百戏，鳞鳞相切，乐声嘈杂，声音要传出十多里路；还有击丸蹴踘，踏索上竿，越野人倒吃冷淘，张九哥吞剑，李外宁药法傀儡，小健儿吐五色水…
迭两段描写侪讲到了一样吃个物事，就是“冷淘”。葛末，冷淘是啥呢？邓之诚解释：就是现在个凉粉。对还是勿对？阿拉今朝就勿去讨论了。
邓之诚也引用杜甫个诗句。杜甫有首《槐叶冷淘》，诗个前段介绍“冷淘”制作过程：农历三月过后，槐树开始长嫩叶，采下来揉（音“肉”）碎抮汁，跟新登场个春小麦磨个“新面”捏勒一道，再做成面条吃。
古代有勿少诗人写过关于“冷淘”个诗，苏东坡《二月十九日携白酒鲈鱼过詹使君，食槐叶冷淘》；王禹偁写《甘菊冷淘》，讲到：俸面新且细，溲牢如玉墩。随刀落银缕，煮投寒泉盆。杂此青青色，芳香敌兰荪。意思是：新登场个面粉邪气细洁，捏成功个面团像玉做个小墩墩；用刀削成丝丝面条，就是“刀削面”啦，味道鲜美。
清朝《帝京岁时纪胜•夏至》一节讲：夏至迭一日，国家要举行祭祀大典，是个重大节日。所以迭一天，京师家家户户侪要吃“冷淘面”，俗称“过水面”。迭个也是京师个一种美味。作者问了到处旅游个朋友，伊拉侪讲，京师“冷淘面”爽口适宜，天下无比。
请注意，作者勒搿搭，已经拿“冷淘”讲作“冷淘面”了，“冬至馄饨夏至面”，中国个交关地方侪有夏至吃面个习俗，一直延续到目前还是搿能。不过，就是勿晓得，现在个北京城里向还有叫“冷淘”个物事伐。
“淘”个本义，是用水冲、汏，用勒饮食名称浪向，是指拌和勒一道。刘半农个民歌就有搿种句子：“情阿哥问我：‘吃格啥个菜？＇‘我末吃格油氽黄豆茶淘饭。’”到现在，吴方言还是拿开水拌饭叫做做“茶淘饭”，酱油拌饭叫做“酱油淘饭”，还有“肉卤淘饭”、“菜汤淘饭”咾啥，各种各样“淘饭”。
我想，古人讲个“冷淘”，一定是拿从冷水里撩出来个刀削面，加调料拌来吃个，冷拌个面类有交关，冷淘应该只是其中一只品种。
可能是我孤陋寡闻，我还真个没看见过古人关于“冷淘”以外个其他冷面个记录。倒是勒1909年上海环球社出版个《图画日报•营业写真》里向，有“卖拌面”一幅图，旁边配文字讲：清真教门冷拌面，莫说浇头一点点。酱油麻油豆芽菜，拌成请把滋味辨。也有喜欢加辣火，越辣越鲜易下肚。不过吃客若是痢痢头，莫加辣火断主顾。
吴方言拿添加勒面条浪向个小菜叫做“浇头”，要是买面一碗想要两份“浇头”，就叫“双浇”。“辣火”就是“辣椒酱”。确实，早期上海冷面摊大多数侪是回族人经营个，“浇头”一般侪是绿豆芽或者青椒丝。
今朝，上海交关面馆一到热天色就增加供应冷面，浇头搭面好分开来买个。一份浇头冷面外加一瓶冰啤，是邪气乐胃个享用。
上海冷面通常用种扁扁个细面条。超市里供应个冷面，侪是已经拿面条蒸得差勿多了再晾干个，买转去摆到开水里一煠，撩出来浇油，我最欢喜用橄榄油，摆到电风扇下头一面吹一面拌，再用小碗加水稀释花生酱，倒进面里，根据各人口味加酱油、醋，欢喜辣个可以加眼辣油辣酱咾啥，一碗冷面，就叫人馋唾水溚溚渧了。
我也到西北人开个面馆里吃过用刀削面做个冷面，感觉并勿像古人描述得介美妙。大概是面条里没摆槐叶汁？或者是调料勿对？也可能是古今生活水平、饮食习惯侪勿一样了伐。
要是有阿里一家店，尝试来制作趟“冷淘”，“冷淘”会勿会得就此重返人间了呢？
作者：薛理勇
讲述：刘时医
——————————————————
丁迪蒙
迪蒙，启迪蒙昧者也。上海市人。原上海大学中文系教师，多年来一直致力于沪语和海派文化的传承。
沪语是吴方言的代表方言，是吴侬软语的典范。她既可以用来拉家常，也同样可以用来朗读各类诗歌散文。
沪语完全可以书写，同粤语可以写作是一样的。本平台所有文章都是经过改写后，用沪语来演绎的，汉字书写也是正确的。
丁迪蒙所撰写的，与沪语相关的著作主要有：
《学说上海话》上海科技文献出版社
《听听说说上海话》少年儿童出版社
《实用沪语》复旦大学出版社
《上海话绕口令》少年儿童出版社
《上海方言词语使用手册》上海教育出版社
《上海话读成语故事》少年儿童出版社
《囡囡学童谣》，少年儿童出版社
《囡囡学成语》，少年儿童出版社
原标题：《冷面个故事》